Carburante alchilàt

Al’era da un tòc che ère incuriosìt da le bòne carateristiche ch’i diss ch’i àpia i carburanti alchilàth, fath apósta par doperài 'n te‘chéle machine che le à un pìthol motór a scòpio, come le motosée, i decespuliadórs, le tosaèrbe, e via descorént. Alòra, par giavàme la pavàna ai dita: “provón ‘sta benzina nóva, che sói curioso da véde chè ché ‘l cambia da la benzina chèla sòlita”. Alòra, l’invèr passàt, i n’ai compràt ‘na tanica da 5 litri, pa' doperàla pa’ la motoséa. Par dìse ‘l vèro, ai da dise che me sputhàva un póc spénde pì del dóple (po’ su po’ dhó 4 euro al litro) de la solita missèla fata in ciasa. Ai però ancia da dise, sempre par dise ‘l vèro, che da cualche an al fastìde pì grant che ‘véve cuàn che doperàve la motoséa l’era pròpio chèl da dové respirà chèla porcarìa de func del scapaménto. Me ricòrde ‘nciamó de cuàn fastìde al nass e a la góla che ai patìt thèrte vòlte, fàndome lavorà co’ pì fadìa e manco pulìdo. Lassànt stà chisti pensiérs e ‘rivànt al dùncue, ai fat fòra la tanica da 5 litri par compràin subito ‘n’altra da 25. Al motìvo l’é chisto: nó vói pì tornà in davór, adéss che ai vedùt che col carburante alchilàt se lavora veraménte mièi e che, finìt da lavorà, no se se ciàta pì strapléns de spùtha dapardùt come cuàn che se dopèra la missèla fata in ciasa (ancia cuàn che l’é fata co’ l’òio chèl bón). Ancia doperànt al decespuliadór, che difarenteménte da la motoséa al’à ‘l scapaménto che ‘l trai davór la schéna de chèl ch’i lo dopèra, se sènt ‘na gran diferéntha in mièi sul lavorà. Su la questión dei schèi, che l'é chèla che pì la destói dal doperà ‘sti carburanti, a mi me par che i schèi che se spénth in pì i séa de sigùr recuperàth da chei vantàgi che ai dit prima. Anciamò pì importante, ancia se nó se riva a sentìlo diretaménte, l’é la gran diminuthión de l’esposithión al benzene e a altre idrocarburi aromatici, ch’i é ricognossùth come fatórs de ris-cio de insorgéntha de tumórs. A propòsito, dhéit a véde chisto link cà e ancia chisto altre cà, che ‘l parla pì in generàl de salùte e sigurétha par chèi che lavóra.

S. D. : (par chèi che n’i la béif tant facilmente) credéme, nó sói pajàt da chèi del petrolio e néncia da chèl de la botéga pì vesìna…